19/03/2020, Igisigo cyahimbwe kandi cyandikwa na Vestina Mukamurenzi.
IMBADUKO Y’AMAHORO
1. Ndahimba mpanga mpera impande
Ndabwira mwese mwumva neza
Kuko ibyo mvuga si ibanga
Si n’ibango rimwe ribajwe
2. Ndavuga impano tuzi twese
Yahawe u Rwanda n’isi yose
Bamwe bamwumva batanamuzi
Kuko bumvise amahame y’iwe
3. Kizito Mihigo Ishema ry’iwacu
Wowe twahawe n’iyaduhanze
Wari impano itagira uko isa
Intayoberana uri mu Bahanzi
4. Intego yawe yari uguhuza
Wari itabaza ry’akaneza
Wari Rudatinya rwanga inabi
Urangwa n’amahoro aho uri hose
5. Watanze amahoro mu gihe cyawe
Uyaharanirira ubudahemuka
Bikugeza mu marembo y’amahina
No mu marembera y’ubuzima
6. Aho wahuye n’abahanya
Baguhonyora Udahigima
Uri nk’intama itariganya
Uri nka ya ‘numa’ waririmbye
7. Uratobora uvuga iby’ingenzi
Ngo amahoro atahe mu banyarwanda
Uti ubwiyunge nibwo bukwiye
Nyamara benshi ntibabyumva
8. Nibwo bahabije umutima wawe
Ngo uve ku izima ube ikigwari
Maze urabyanga uti ntibikwiye
Uti sinzatatira Uwampanze
9. Sinzagambana biragatsindwa
Wabaye intwari turagushima
Kizito usize umurage mwiza
Igendere intwari ucyuye imihigo
10. Wakoze ibyananiraga benshi
Kandi watanze urugero rwiza
Kuko witanze wese uko uri
Uzashimwa mu bihe byose
11. Usize abana mu kwizera
Barumuna na bakuru bawe
Warenze amoko wunga abantu
Ushaka amahoro ku bantu bose
12. Igendere ntwari ikenyeye inkindi
Inyuma yawe hari abandi
Batazapfukamira bayari
Kuko watanze urugero rwiza
13. Aho erega tuvuze ibyacu
Ntawaturusha ubutoni iwacu
Ahaaaa… intumwa ntiyicwa,
Murantunge uruseko
Mwabigize ibisanzwe
14. Nyamara isanzure rirabareba
Erega iyi si turimo ntisakaye
Ejo ni njyewe mutware wanjye
Ariko ejobundi harakureba
15. Iri sanzure niko riteye
Risakuza rirembuza buri wese
Ubwo inkera zizashira mu gikari
Inkindi zizabona akazi kazo
16. Aho ntizizaririmba nka wawundi
Ati iryo mbonye bantu banjye
Nyamara bose baragiye
Ibuziraherezo iyo tujya twese
17. Abagize Imana baruhanze
Yego ubuhungiro simbushima
Burashishimura ugashira wumva
Ariko rero nka wawundi
Aho gupfa risashe napfa rirenze
18. Rubyiruko mwese mbivuze mwumva
Mufate umwanya mugire intego
Mugere ikirenge mu cyabanje
Muzashinjwe gufasha abantu
Kugeza heza imbere hazaza
19. Ntimugatinye kuba ibirenga
Nimube ingenzi aho muri hose
Muvuge ibyanyu bimwe by’ingenzi
Bigenzurwe batazabizambya
20. Reka nisabire ibirenga
Abanyacyubahiro bari aha
Ntimugakunde kubona umuntu
Abuzwa ituze bamukerensa
21. Ahutazwa azira akamama
Muzi neza ko buri muntu
Akwiye icyubahiro mu bandi
Nimusobanukirwe ko umuntu
Afite impamvu zo kuba atuje
22. Rurema Imana yaremye Mihigo
Aduhe twese kureka inabi
Umunyarwanda abone agahenge
Turashaka amahoro iwacu !
23. Ubwenge ubuhanga ubuvumbuzi
Ntibishobora kubaho tubuze amahoro
Turasaba amahoro mu banyarwanda
Kandi akwire no ku isi hose!
